Tuesday, March 29, 2016

രാഗിണി ടീച്ചറുടെ
ക്ലാസ്സിന്റെ അരമതിലിനുമപ്പുറം
കലപിലയിളകുന്ന
പൂളത്തോട്ടത്തിനുമപ്പുറം
ചുവപ്പനരിമുല്ലകൾ തിക്കുന്ന
വേലിക്കപ്പുറം
അമ്മയുടെ ചലനം

കൂട്ടത്തിലാരൊക്കെയോ ചൂണ്ടിക്കാണിക്കുന്നുണ്ട്
ആരൊക്കെയോ കൌതുകത്തോടെന്നെ നോക്കുന്നുണ്ട്

സ്കൂളിനു പിറകിലെ മരങ്ങളുടെ തണലുണ്ട്
അപ്പുറവുമിപ്പുറവും വെയിൽ
നുരിയിട്ടുതുടങ്ങിയിട്ടുണ്ട്
ഒരു ചലനചിത്രത്തിൻറെ നാലതിരുകൾ
അതിൽ വീണ്ടും വീണ്ടും
വെയിലിനെ കൂസാതെ, ചിന്തയിൽ വിയർത്ത്
നാനാവിധ വരകൾ കാണുന്ന മുഖമുയർത്തി
അമ്മ പോകുന്നു.

ഓരോ പഴുതിലൂടെയും നൂഴുകയാണ്
എന്റെ കണ്ണുകളും തിക്കുകയാണ്

No comments:

Post a Comment